Yeni Təhsil Mərkəzi – yeni ünvan
01 noyabr 2017-ci il tarixdə Qəbələ Peşə məktəbi öz ünvanını müasir standartlara cavab verən yeni Təhsil Mərkəzinə dəyişdi. Qəbələ Dövlət Peşə Təhsil Mərkəzinin ərazisi 2,85 ha-dır. Burada 600 dən artıq meyvə və bəzək ağacları əkilmiş, 1,1 ha yaşıllıq salınmışdır. Təhsil Mərkəzində kənd təsərrüfatı profilli və iqtisadiyyatın digər sahələrinə uyğun mütəxəssislər hazırlanır. Təhsil Mərkəzinə yeni 10 adda müxtəlif kənd təsərrüfatı texnikası verilmişdir.
Azərbaycan Respublikası Təhsil nazirinin təqdimatı ilə Qəbələ Dövlət Peşə Təhsil Mərkəzində operativ məsələləri yerindəcə həll etmək, Təhsil Mərkəzinin işinin təşkili üçün Mərkəzin direktoru vəzifələrini icra etmək üçün Peşə Təhsili üzrə Dövlət Agentliyinin peşə yönümü və işə götürənlərlə əməkdaşlıq şöbəsinin müdiri Eldar Salahova həvalə edilmişdir. Eldar Salahovun təşkilatçılığı ilə, Təhsil Mərkəzində tədris prosesinin təşkili, emalatxana, laboratoriya və təcrübə sahəsində təlim dərslərinin keçirilməsi, büdcədənkənar vəsaitlərin artırılması sahəsində işlər aparılmışdır.
Qısa müddət ərzində təcrübə sahəsinin 0,45 ha-da sarımsaq əkilmiş, 56,35 kub m. həcmində istixana hazırlanmışdır. Burada tərəvəz məhsulları becərilir. Təcrübə sahəsində görülmüş işlər “bitkiçilik mütəxəssisi” ixtisası üzrə təhsil alan şagirdlərin təlim dərslərində aparılmışdır.
Təhsil Mərkəzinin kənd təsərrüfatı texnikasının sazlığı yoxlanılmış, aşkar edilmiş qüsurlar yerindəcə həll edilmişdir.
Qısa müddət ərzində Mərkəzin qışa hazırlıq məsələləri və digər problemlər öz müsbət həllini tapmışdır.
